Irani ka “më pak kapacitet” për të prodhuar shpejt një armë bërthamore dhe është “shumë më larg” nga realizimi i saj sot për shkak të sulmeve të SHBA-së ndaj tre objekteve bërthamore në vend, tha Sekretari amerikan i Shtetit, Marco Rubio, të mërkurën në Hagë.

“Zbulimet nga inteligjenca janë ndër gjërat më frustuese që ekzistojnë,” tha Rubio, duke iu përgjigjur një pyetjeje lidhur me raportimin e CNN për një vlerësim të hershëm të inteligjencës, sipas të cilit sulmet amerikane nuk e kanë shkatërruar bërthamën e programit bërthamor të Iranit dhe ka të ngjarë që vetëm ta kenë vonuar atë për disa muaj.

Rubio shtoi se shpesh inteligjenca “keqinterpretohet”.

“Programi bërthamor i Iranit sot është shtyrë prapa ndjeshëm në krahasim me një javë më parë. Ai është në gjendje shumë më të keqe sot për shkak të veprimeve të SHBA-së dhe disa veprimeve të ndërmarra nga Izraeli,” tha Rubio për “Politico”.

“Pra, në fund të ditës, ata janë shumë më larg armës bërthamore sot sesa ishin para se presidenti të merrte këtë hap të guximshëm,” shtoi ai, duke theksuar se është shkaktuar “dëmtim shumë i rëndësishëm dhe i konsiderueshëm” në “një sërë komponentësh të ndryshëm”.

Ai shtoi se SHBA-ja është “ende duke mësuar më shumë për këtë”, pasi dëmet ndodhën “thellë nën tokë”.